*(Sauti ya vicheko vya marafiki watatu wa binti huyo ikisikika kuta zote za sebule. Wameingia ghafla wakiwa wamebeba mifuko ya manunuzi, tayari kwa maandalizi ya sherehe kubwa ya usiku huo.)*

Binti alihisi jasho jembamba likimtiririka mgongoni. Mchumba wake alikuwa amekaa kwenye sofa, akizungumza na marafiki zake kuhusu mradi mpya wa ujenzi. Wakati huo huo, kule bafuni, mama yake alikuwa ameanza kukohoa kikohozi cha pumu kilichomtesa kwa miaka mingi.

"Kuna sauti gani hiyo?" mmoja wa marafiki zake, binti wa waziri, aliuliza huku akitega sikio.

Moyo wa binti ulisimama. Kabla hajapata uongo wa kusema, mlango wa bafuni ulifunguka kidogo. Mama yake, akishindwa kuvumilia hewa nzito ya bafuni, alitoka nje akihema kwa shida, akijishika kifua. Alionekana mchovu, akiwa na kilemba chake kilicholegea.

*(Ukimya mzito ulitawala sebuleni. Kila mmoja alimstama bibi huyo kwa mshangao na dharau.)*

"Huyu ni nani?" mchumba wake aliuliza, akimtazama binti kwa macho ya mashaka.

Binti alihisi dunia inapasuka katikati. Alimtazama mama yake, kisha akawatazama marafiki zake matajiri. Akili yake ilitafuta mlango wa dharura wa uongo. Kwa sauti ya kujiamini iliyoficha tetemeko la moyoni, alicheka kicheko cha kejeli.

"Ah! Jamani, huyu mama..." binti alianza kusema huku akimsogelea mama yake na kumshika mkono kwa nguvu ya siri ili amnyamazishe. "Amepotea njia masikini. Aligonga hapa nje akiwa anaomba msaada wa simu, anasema mwanae amemtelekeza kituo cha basi. Nimempa maji na kumruhusu apumzike kidogo kabla mwanae hajaja kumchukua."

Mama yake alimtazama mwanae kwa macho yaliyojaa mshangao. Alitaka kusema, *"Mwanangu, mimi ni mama yako!"* lakini binti alimminya mkono wake kwa nguvu kiasi cha kumfanya mzee huyo aingie na hofu.

"Maskini, kumbe kuna watu wakatili hivi mjini?" rafiki yake mmoja alisema kwa dharau. "Mtoe nje mpenzi, harufu ya huku kijijini inaharibu 'perfume' ya humu ndani."

Binti alitikisa kichwa haraka. "Ndio, ndio! Namsaidia sasa hivi atoke nje, mwanae ameshanipigia simu yuko getini."

Alimvuta mama yake kwa nguvu kuelekea mlangoni. Alipofika nje kwenye baridi, alimnong'oneza mama yake kwa sauti ya kikatili: "Kaa hapa nje mpaka hawa watu waondoke. Ukisema neno moja zaidi, nitahakikisha unarudi kijijini usiku huu huu kwa miguu!"

Mama alibaki amesimama kwenye giza la nje, akitazama mwanga wa taa za ndani kupitia vioo, huku akisikia sauti ya mwanae akicheka na marafiki zake kana kwamba hakuna kitu kimetokea.

*(Sauti ya glasi za mvinyo zikigongana "Cheers!", ikifuatiwa na sauti ya mama akivuta kamasi kwa uchungu mkubwa.)*

---
**ITAENDELEA SEHEMU YA 8...**