Giza la usiku ule lilikuwa zito, lakini halikufunika vilio vilivyokuwa vikitoka ndani ya nyumba ya wazazi wa Sulee. Masofa alikuwa ameshaondoka baada ya kumwaga kila kitu, akimwacha Sulee akiwa amejikunyata kwenye sakafu kama kuku aliyenyeshewa na mvua.

"Sulee, mwanangu... uliwezaje kutufanyia hivi?" mama yake aliongea huku akijifuta machozi kwa kanga. "Heshima yote tuliyopewa na Masofa, umeitupa chooni kwa ajili ya mwanaume anayejifanya daktari?"

Sulee hakujibu. Alihisi maumivu makali yakipanda kutoka kiunoni kuelekea tumboni. Ule muwasho sasa umekuwa kama moto wa petroli. Alijikokota kuelekea bafuni, na alipovua nguo zake, alipiga yowe la hofu. Mwili wake ulikuwa umeanza kutokwa na vipele vya ajabu na usaha mwingi uliokuwa na rangi ya kijani. Aligundua kuwa "tiba" ya mwisho ya Dokta Kisarawe haikuwa ya kusafisha, bali ilikuwa ni sumu ya mwisho.

Wakati huo huo, kule Hospitali ya Rufaa, hali ya Monica ilikuwa ya kukata tamaa. Juma alikuwa ameketi kwenye benchi la hospitali, kichwa chake kikiwa kimeinama.

Daktari bingwa wa magonjwa ya wanawake alitoka wodini huku akivua glavu zake zilizolowa damu. "Bwana Juma, tumefanya kila tuwezalo kuokoa maisha ya mkeo. Lakini nina habari mbaya."

Juma alinyanyuka kwa unyonge. "Habari gani daktari? Atapata mtoto?"

Daktari alitikisa kichwa kwa huzuni. "Haikuwa tiba ya uzazi ile aliyokuwa akipewa. Yule mtu alimuharibu kabisa. Maambukizi (Sepsis) yamesambaa sana. Ili kuokoa maisha yake, tumelazimika kuondoa kizazi chote (Hysterectomy). Monica hataweza kuwa na mtoto tena maishani mwake, na atahitaji matumizi ya dawa za maisha yake yote kuzuia madhara zaidi ya yale maradhi aliyoambukizwa."

Juma alihisi kama dunia imepasuka. Alikumbuka jinsi Monica alivyokuwa akimshawishi waende kwa Dokta Kisarawe, na jinsi yeye alivyokuwa akijilaumu kuwa labda yeye ndiye mwenye tatizo. Kumbe mke wake alikuwa anapandikizwa mauti.

Kule gerezani, Dokta Kisarawe alikuwa amewekwa kwenye chumba cha mahojiano (Interrogation room). Uso wake ulikuwa umevimba baada ya kipigo cha polisi na raia. Askari mmoja alimtupia picha za wagonjwa wake walioumia.

"Sema ukweli, Kisarawe. Wewe ni nani na kwanini umefanya hivi?"

Kisarawe alicheka kicheko cha kinyama, sauti yake ikiwa imepasuka. "Mimi ni fundi maabara tu niliyefukuzwa kazi. Lakini hawa wanawake ni wajinga. Wanapenda njia za mkato. Unadhani Sulee na Monica ndio pekee? Kuna wengi! Hata wake za wakubwa hapa mtaani wamepita kwenye kile kitanda. Mimi niliwapa kile walichokuwa wanakitaka... 'raha' na 'matumaini' feki."

Wakati Kisarawe akitoa siri hizo nzito, Sulee alikuwa amezimia nyumbani kwao kutokana na maumivu makali, huku Masofa akiwa peke yake nyumbani kwake, akichoma moto picha zote za harusi yao.

---
**Katika EPISODE 12: "MZIMU WA USALITI"**
Sulee anapelekwa hospitali na kukutana na Monica wodini, wakiwa wote wamepoteza kila kitu. Wakati huo huo, siri za wanawake wengine waliozibuliwa "mishipa" na Kisarawe zinaanza kuvuja, na kusababisha ndoa nyingi mtaani kuanza kutetereka. Usikose!