Siku ilipowadia, Kelvin alipanga kila kitu kwa uangalifu. Alitaka hii iwe siku ya pekee itakayofuta kumbukumbu zote za dhoruba walizopitia shuleni. Walikuwa wamekaribiana sana, na sasa walikuwa tayari kuanza safari mpya kama wachumba rasmi.

Kelvin alimwomba Briana waende sehemu moja tulivu na ya kupendeza nje kidogo ya mji. Walifika kwenye bustani kubwa iliyojulikana kwa uzuri wake na maua yanayochanua wakati wote wa mwaka. Briana alishangaa kuona Kelvin akiwa na hamu isiyokuwa ya kawaida siku hiyo, huku akionekana kuwa na siri nzito moyoni mwake.

Walitembea kwa utulivu wakizungumza kuhusu maisha yao, ndoto zao, na jinsi walivyopambana dhidi ya fitina za Mwalimu Vincent. Ghafla, katikati ya harufu nzuri ya maua, Kelvin alisimama na kumshika Briana mikono yote miwili. Alimtazama machoni kwa upendo uleule uliomfanya Briana apende shule zaidi ya awali.

Kelvin alichomoa boksi dogo la velveti kutoka kwenye mfuko wake. Alipiga goti moja chini, jambo lililomfanya Briana apige yowe dogo la furaha huku akiziba mdomo wake kwa mikono.

"Briana," Kelvin alianza kwa sauti ya upole, "nimekuwa nawe katika kila hatua ya mafanikio yako. Tumevumiliana, tumeshinda mitego, na sasa nataka kila siku ya maisha yangu iliyobaki niamke nikiwa pembeni yako. Je, utakubali kuwa mchumba wangu na mke wangu mtarajiwa?"

Machozi ya furaha yalimtoka Briana. "Ndio, Kelvin! Nitakuwa mke wako mara elfu!"

Kelvin alimvisha pete ya dhahabu iliyong'aa, ishara ya upendo usio na mwisho. Tangu siku hiyo, maisha yao yalibadilika. Kelvin alizidi kung'ara kama mwalimu bora, akishinda tuzo mbalimbali kwa ufaulu wa wanafunzi wake, huku akimsaidia Briana kwa kila hali katika masomo yake ya juu. Walijenga mahusiano yao kwa misingi ya heshima, wakijua kuwa sasa hakuna wa kuwatenganisha.

**Inaendelea Episode 15...**