Nilihisi kama ulimwengu unapasuka. Kila kijiko cha chakula alichokuwa akikimeza Happy kilihisi kama ni msumari unaopigiliwa kwenye jeneza lake. Nilijaribu kuinuka lakini kiti kile cha dhahabu kilikuwa kimenishika kama sumaku, nikiwa mfungwa ndani ya ikulu yangu mwenyewe.

Happy alimaliza kula, kisha akaanza kupepesuka. Macho yake yaliyokuwa yamepoteza nuru yalinigeukia kwa mara ya mwisho. "Kaka... mbona ninasikia baridi sana? Kaka, mbona unakaa mbali nami?"

*(Sauti: Thud! – Sauti ya Happy akianguka sakafuni baada ya kupoteza fahamu)*

Munil alicheka, kicheko chake safari hii kikichanganyika na sauti za viumbe waliokuwa nje ya nyumba. "Kazi imeanza mume wangu. Sasa, chukua kile kisu ulichopewa na mzee wa Bagamoyo. Ni wakati wa kulipisha kosa lako la kunichungulia."

Niliuona ule mfuko mweusi ukiwa mezani. Niliufungua kwa mikono inayotetema, na kutoa kisu chenye mpini wa mfupa wa binadamu na makali yaliyokuwa yakitoa mwanga wa kijani.

*(Sauti: Shing! – Sauti ya chuma kikali kikichomolewa)*

"Siwezi! Munil, huyu ni damu yangu! Chukuwa nyumba, chukuwa kila kitu lakini mwache Happy!" nilipiga kelele huku nikigaragara sakafuni.

Munil alinikaribia, miguu yake ile yenye kwato ikigonga sakafu kwa kishindo. Alishika taya langu na kunilazimisha kumtazama. Uso wake sasa haukuwa na pua, bali tundu mbili tu zinazotoa moshi wa udi.

"Ukishindwa wewe, nitamwachia yule aliye ndani ya kibuyu atoke nje. Na akitoka, hataacha hata mfupa mmoja wa huyu binti. Chagua kifo cha amani kwa kisu chako, au kifo cha kuteswa na mnyama wa kibuyu!"

*(Sauti: Rrrrrrrr... Grrrrrrr – Sauti ya kiumbe kikikwaruza kuta za kibuyu kwa ndani)*

Nilikisogelea mwili wa Happy uliokuwa umelala karibu na kile kibuyu. Damu ile iliyokuwa ikitiririka kutoka kwenye kibuyu sasa ilikuwa imeshafika kwenye nguo za Happy. Ghafla, Happy alishtuka na kufumbua macho. Safari hii, macho yake yalikuwa ya kawaida, na alikuwa akinitazama kwa hofu na huruma.

"Kaka... usifanye hivyo," Happy alinong'ona kwa sauti hafifu. "Kaka, mama alituambia tulindane. Usikubali roho yako ipotee kwa ajili ya vitu hivi."

*(Sauti: [Sauti ya chini kabisa]: Happy... kimbia... Happy...)*

Sauti ile ilitoka ndani ya kibuyu, na niliitambua; ilikuwa ni sauti ya mama yetu aliyefariki miaka mitano iliyopita! Kumbe mama naye alikuwa mateka ndani ya kile kibuyu cha dhahabu!

Hasira ya ajabu ilinilipuka. Badala ya kumshambulia Happy, niligeuka na kukielekezea kisu kile kile kibuyu. "Munil, ulinidanganya! Ulimchukua mama yangu pia?!"

Munil alipiga kelele ya kuumizwa, sauti ambayo ilipasua vioo vyote vya madirisha ya lile ghorofa.

*(Sauti: KRAAAAASH! – Sauti ya vioo vikivunjika kila kona)*

"Usiuthubutu mkono wako kwenye kibuyu cha mfalme!" Munil alifoka huku akijigeuza kuwa kiumbe kirefu chenye mikono sita, kila mkono ukiwa na kucha ndefu kama majembe.

Nilikitupa kile kisu kuelekea kwenye kibuyu kwa nguvu zangu zote. Kisu kile kilipogusa tu kuta za kibuyu, mlipuko mkubwa wa mwanga mweupe ulitokea, na sauti ya maelfu ya watu wakipiga kelele za uhuru ikasikika.

*(Sauti: BOOOOOM! – Mlipuko mkubwa unaoziba masikio)*

Nilihisi kurushwa hewani, na kila kitu kikawa giza.

---
**Itaendelea Episode 9: KUVUNJIKA KWA MKATABA.**