Baada ya Halima kuondoka, Jonas alibaki ofisini kwake akijinyoosha huku tabasamu la ushindi likiwa bado limeganda usoni mwake. Hakujua kuwa sekunde chache zilizopita, rekodi ya sauti ya "interview" yake ilikuwa tayari imetua kwenye simu ya Jessica. Jonas alijiona kama mungu mdogo, lakini madhabahu yake ya dhambi ilikuwa inaanza kupata nyufa.

Jonas alinyanyuka na kuelekea mlangoni. Alipofungua, alikutana na uso wa Jessica uliokuwa na tabasamu la bandia, tabasamu ambalo Jonas hakung’amua kuwa lilificha sumu kali.

"Vipi Jonas, usaili wa Halima umeendaje? Maana umechukua muda mrefu kidogo," Jessica aliuliza kwa sauti ya utulivu iliyopitiliza.

Jonas alijitukuza, "Ah, Jessica... unajua tena, kumpata mtu mwenye weledi inabidi uchimbue haswa. Halima ana sifa, kesho anaanza kazi."

"Hongera sana," Jessica alijibu huku akimkazia macho. "Nimekuandalia ripoti ya waombaji waliobaki, iko mezani kwako. Na pia... bosi mkuu anataka kukuona tena jioni hii kabla hujaondoka."

Jonas alihisi mapigo ya moyo yakidunda. "Bosi tena? Kuna nini?"

"Sijui bosi wangu," Jessica alijibu kwa sauti ya kurembua, kisha akageuka na kuondoka. Jonas hakujua kuwa Jessica alikuwa amewasiliana na Erica, binti wa kwanza aliyechezewa na Jonas, na walikuwa wamepanga mkakati wa kumwangusha mwamba huyo.

Jioni ilipofika, Jonas aliingia ofisini kwa Mzee Kimario akiwa amejikaza. Alikuta mzee huyo ameketi huku ameshika bahasha ya khaki.

"Keti Jonas," Mzee Kimario alisema bila kumuangalia. "Kuna jambo limejitokeza. Nimepokea barua kutoka kwa daktari mmoja hapa mjini... daktari ambaye Erica alikwenda kumuona leo mchana baada ya kutoka hapa."

Jonas alihisi miguu ikilegea. "Daktari? Erica ana shida gani?"

Mzee Kimario alinyanyua macho yake, yakiwa yamejaa hasira na masikitiko. "Erica amekutuhumu kwa unyanyasaji wa kijinsia ili ampe kazi. Lakini si hilo tu... daktari amethibitisha kuwa Erica ana maambukizi ya virusi vya UKIMWI, na amekuwa akitumia dawa kwa muda mrefu. Jonas, kama uligusa mwili wake... basi umejiandikia hukumu ya kifo."

Dunia ilisimama kwa Jonas. Ghafla, ofisi ilianza kumzunguka. Alikumbuka jinsi alivyomfanyia Erica kwa fujo na bila kinga, akiamini yeye ndiye mjanja. Sauti za Halima na wasichana wengine zilianza kumlululuma kichwani mwake kama radi.

Wakati Jonas akiwa katika hali hiyo ya kuchanganyikiwa, mlango wa ofisi ulifunguka kwa nguvu. Jessica aliingia akiwa na simu yake mkononi, akicheza ile rekodi ya sauti ya Jonas na Halima.

"Mchezo umeisha, Jonas," Jessica alisema kwa sauti ya baridi.

**INAENDELEA SEHEMU YA 6...**