Baada ya maneno ya Mzee Kimario na rekodi ya Jessica, Jonas alihisi kama damu imeacha kutiririka mwilini mwake. Kila kitu kilikuwa kimebadilika kwa sekunde moja tu. Ofisi ambayo masaa machache yaliyopita ilikuwa uwanja wake wa starehe, sasa ilionekana kama kaburi lenye viyoyozi.

"U-UKIMWI?" Jonas alijikata kauli, sauti yake ikitokea kama ya mtu anayenyongwa. "Hapana... Erica hawezi kuwa na... hawezi!"

"Huwezi kubishana na vipimo vya daktari, Jonas," Mzee Kimario alisema kwa sauti ya kikatili. "Lakini hapa hatupo kwa ajili ya afya yako tu. Tuko hapa kwa ajili ya uchafu ulioufanya kwenye ofisi yangu. Jessica, mpe barua yake."

Jessica alimsogelea Jonas. Uso wake hukuwa na huruma hata chembe. Alimkabidhi Jonas bahasha nyeupe ya khaki huku akimkazia macho. "Hiyo ni barua ya kusimamishwa kazi mara moja bila malipo yoyote. Na pia, bosi ameshapiga simu polisi. Unyanyasaji wa kijinsia ni kosa la jinai, Jonas."

Jonas alijaribu kusimama, lakini magoti yake yalikataa. Alianza kuhisi dalili ambazo hakuwahi kuwa nazo — ghafla akahisi kama koo linamwasha, kama mwili unapata joto, na kama kichwa kinauma. Hofu (Paranoia) ilianza kumtafuna. Alikumbuka kila sekunde aliyokuwa na Erica; alikumbuka joto la mwili wake, na jinsi alivyojivuna kuwa yeye ni mwanaume haswa.

"Mzee... tafadhali..." Jonas aliomba huku machozi yakimtiririka. "Nisamehe, nitarekebisha kila kitu. Nitawapa kazi wasichana wote, nitafanya kazi usiku na mchana."

"Huchelewi kuwapa kazi ili uendelee kuwatumia," Mzee Kimario alifyatuka kwa hasira. "Ondoka kabla sijakuburuza nje mimi mwenyewe!"

Jonas alitoka ofisini huku akitapa-tapa. Alipofika kwenye korido, alikutana na Halima, ambaye alikuwa amekuja kuchukua barua yake ya ajira kama alivyoahidiwa. Halima alikuwa amependeza sana, akitabasamu kwa ushindi.

"Vipi mume wangu? Mbona unatoka kama unakimbizwa na zimwi?" Halima aliuliza huku akimshika Jonas mkono.

Jonas aliuondoa mkono wake kwa fujo kama amegusa moto. "Halima... Erica... Erica ana UKIMWI!"

Uso wa Halima ulibadilika na kuwa mweupe kama karatasi. "Unasemaje?"

"Erica... binti niliyekuwa naye kabla yako... ana maambukizi. Na mimi... mimi nimegusa mwili wake bila kinga," Jonas alizungumza huku akitetemeka mwili mzima.

Halima alihisi dunia inapasuka. Alikumbuka jinsi Jonas alivyomfanyia naye jana yake, bila kinga, akimuahidi cheo cha juu. Alijitazama mikono yake, kisha akamtazama Jonas kwa chuki ambayo haijawahi kutokea. "Ulinitumia kama tambara la deki, Jonas? Ulijua una hatari na bado ukanigusa?"

Bila onyo, Halima alimtandika Jonas kofi zito la uso ambalo lilimfanya ayumbeyumbe. "Kama nimepata, naapa nitakua mwanamke wa mwisho kukuona ukiwa hai!"

Jonas alibaki peke yake kwenye korido, akiangalia Halima akiondoka kwa hasira na kilio. Ghafla, alihisi kichefuchefu kikali. Alikimbilia msalani na kuanza kutapika mfululizo. Kila tone la matapishi lilimkumbusha dhambi zake. Alijitazama kwenye kioo, akaona sura ya mwanaume aliyepotea, mwanaume aliyewauza wasichana kwa tamaa ya dakika tano.

Sasa, mtego wa 'Vua chupi nikupe ajira' ulikuwa umemnasa yeye mwenyewe.

**INAENDELEA SEHEMU YA 7...**