Asha alijikuta kwenye wakati mgumu. Alishindwa kumkatalia Boss Saidi kwa sababu ya fadhila kubwa alizomfanyia, lakini moyoni mwake kulikuwa na wasiwasi. Alikumbuka maneno ya Happy kuhusu mitego ya wanaume wenye pesa. Saa mbili usiku, gari la kifahari la Saidi lilisimama mbele ya nyumba mpya ya Asha, naye akapanda huku akijaribu kuficha hofu yake.

Walipofika kwenye hoteli ya hadhi ya juu, Saidi alimvutia kiti Asha kwa uungwana. "Asha, usinihofu. Mimi ni mwanaume niliyeona mengi, na mwanamke kama wewe ni adimu kupatikana mjini hapa," Saidi alianza kusema huku akimtazama Asha machoni. "Nataka uwe msaidizi wangu wa karibu, si ofisini tu, bali hata katika miradi yangu binafsi. Na kwa kufanya hivyo, nitahakikisha unakuwa mmoja wa wanawake wenye nguvu hapa mjini."

Wakati mazungumzo hayo yakiendelea, katika upande mwingine wa mji, Pili Kiswaswadu alikuwa amekaa kwenye kochi la ngozi ndani ya nyumba ya Manyama. Manyama alikuwa mwanaume mmoja mfupi, mnene na mwenye sura ya ukali anayemiliki kampuni pinzani na Saidi.

"Pili, nataka unipe kila siri unayoijua kuhusu ofisi ya Saidi kupitia kwa yule mpenzi wako Juma," Manyama alisema huku akivuta sigara. "Saidi anajifanya msafi sana, lakini lazima kuna mahali anateleza. Tukimwangusha Saidi, nakupa duka kubwa zaidi ya lile ulilokuwa nalo, na Juma atatoka gerezani ndani ya wiki moja."

Pili alicheka kicheko chake cha kiswaswadu. "Manyama, usijali. Juma anajua siri nyingi za manunuzi ya vifaa. Na sasa hivi kule ofisini kuna yule mshamba Asha na mla nauli Happy. Nitawatumia hao hao kumpoteza Saidi. Happy ana njaa ya pesa, nitamnunua kwa gharama yoyote."

Siku iliyofuata ofisini, Happy alikuwa akideki korido kwa unyonge wakati Pili Kiswaswadu alipotokeza akiwa amevaa miwani meusi na kupendeza kupita kiasi. Alimkaribia Happy na kutupa noti ya elfu kumi chini ya dekio la Happy.

"Happy, mambo gani haya ya kusafisha vyoo?" Pili alinong'ona. "Hivi unajua Asha anakula kuku kwa mrija na Boss Saidi huku wewe ukisugua sakafu? Manyama anataka kukuona. Kuna dili la maana litakalokufanya uache huu ufagio na uanze kumiliki duka lako mwenyewe."

Happy alitazama ile elfu kumi, kisha akamtazama Pili. Moyo wake ulianza kupiga pasi. Alikumbuka toba yake, lakini pia alihisi wivu kuona Asha akipaa wakati yeye akibaki kwenye uchafu.

"Dili gani Pili?" Happy aliuliza kwa sauti ya chini, huku akizungusha macho kuona kama kuna mtu anawaona.

"Njoo jioni hii mahali nitakapokuelekeza. Usiwe mjinga, hii ndiyo 'nauli' ya kweli ya kuelekea maisha ya juu, sio ile ya kina Frank," Pili alimalizia na kuondoka zake.

Happy alibaki ameshika lile dekio, akifikiria. Je, atabaki kwenye uaminifu na umaskini wa usafi, au atarudi kwenye asili yake ya tamaa na kujiunga na Pili kumhujumu mtu aliyemsaidia?

---
**ITAENDELEA...**