Mchana kutwa Happy alikuwa kama mtu aliyechanganyikiwa. Kila alipolitazama lile dekio na harufu ya sabuni ya vyoo, maneno ya Pili Kiswaswadu yalikuwa yakimrudia kichwani mwake. "Asha anakula kuku kwa mrija, wewe unasugua sakafu." Wivu ulianza kumtafuna taratibu. Alijihisi kama mfungwa ndani ya jengo lile lile ambalo rafiki yake wa karibu alikuwa akitendewa kama malkia.

Wakati wa kutoka kazini, Asha alimkuta Happy akiwa amekaa kwenye ngazi za nyuma, uso wake ukiwa umekunjamana.

"Happy, mbona bado upo hapa? Twende nyumbani nikakupikie chakula kizuri, leo nimepewa posho ya ziada na Boss," Asha alisema kwa bashasha.

Happy alimtazama Asha kuanzia miguuni mpaka kichwani. Viatu vipya, harufu ya pafyum ya bei ghali—kila kitu kuhusu Asha kilikuwa kimebadilika. "Wewe nenda tu Asha, mimi nina miadi na mtu mmoja nataka nikaonane naye," Happy alijibu kwa sauti ya baridi.

Asha alistuka. "Miadi? Happy, kumbuka bado upo kwenye uangalizi wa James na Saidi. Usiende kufanya makosa yatakayokurudisha kule tulikotoka."

"Wewe Asha usinifundishe maisha!" Happy alifoka ghafla, hali iliyomfanya Asha apigwe na butwaa. "Umeshapata maisha mazuri sasa unataka kunionyesha kuwa mimi ni mjinga? Nenda kapumzike na huyo Boss wako!"

Asha aliondoka kwa huzuni, akijua kuwa ile roho ya zamani ya Happy ya kupenda makuu na tamaa ilikuwa inaanza kuchomoza upya.

Happy alielekea mahali alipoambiwa na Pili. Ilikuwa ni baa moja ya siri iliyopo pembezoni mwa mji. Alimkuta Pili na mwanaume mmoja mwenye sura ya upole lakini macho ya kijasusi—huyu alikuwa ni msaidizi wa Manyama.

"Karibu Happy," Pili alisema huku akimvutia kiti. "Huyu hapa ni mjumbe wa Manyama. Hatutaki mengi kutoka kwako. Tunajua wewe ndiye unayesafisha ofisi ya Saidi kila siku jioni baada ya watu kuondoka. Tunataka uweke kifaa hiki kidogo chini ya meza yake ya siri."

Mjumbe yule alitoa kifaa kidogo kama kifungo cha shati. "Kifaa hiki kitatusaidia kusikia kila kitu anachokiongea Saidi. Ukifanya hivi, kesho asubuhi kwenye akaunti yako utaikuta milioni moja. Na hiyo ni kianzio tu."

Milioni moja! Happy alihisi mapigo ya moyo yakisimama. Hiyo ilikuwa ni 'nauli' ya kutosha kuanza maisha mapya na kuacha kusugua vyoo. Lakini alifikiria uaminifu wa Asha na fadhila za Saidi.

"Lakini... nikiingia matatani?" Happy aliuliza kwa sauti ya kutetemeka.

Pili alicheka. "Matatani gani? Wewe ni mfanya usafi, nani atakuhisi? Watu wote wanajua wewe ni mnyonge na unajuta. Tumia hiyo hali kama kingao chako. Kumbuka Happy, mjini hapa usipokuwa na akili utakufa njaa, na msimamo wako ulikuwa ni upi? **Mpenda pumbu hali nauli.** Sasa tumia nafasi yako ule nauli ya Manyama!"

Happy alinyosha mkono na kukichukua kile kifaa. Mikono yake ilikuwa ikitetemeka, lakini tamaa ilikuwa imeshachukua mkondo.

Wakati huo huo, James alikuwa ameketi kwenye gari lake nje ya ile baa, akiwa amewaona wote watatu kupitia kioo cha gari. Alichukua simu yake na kumpigia Saidi. "Boss, mchezo ule uliokuwa unategemea umeanza rasmi. Happy ameshachukua chambo."

Kumbe, kila kitu kilikuwa ni mtego ndani ya mtego mwingine. Na Happy, kwa mara nyingine tena, alikuwa anajipeleka mwenyewe kwenye mdomo wa simba bila kujua.

---
**ITAENDELEA...**